Су ресурстарының болашағы — ғылымға, ал кадрлық шешімдер — әділдік пен ашықтыққа негізделуі керек

Қазақстанның «Байтақ» жасылдар партиясы «ҚазҒЗИ су шаруашылығы» ЖШС-дегі 2025–2026 жылдар аралығындағы бірінші басшыларды тағайындау үдерісінің заңдылығы мен ашықтығына қатысты азаматтардың өтінішін қарауға алды.

Су — еліміздің стратегиялық байлығы, ал су шаруашылығы саласындағы ғылыми зерттеулердің сапасы ұлттық қауіпсіздікпен, экологиялық тұрақтылықпен және болашақ ұрпақтың әл-ауқатымен тікелей байланысты.

Сондықтан бұл саладағы басшылық қызметтерге тағайындау мәселесі қоғамның назарынан тыс қалмауы тиіс. Кадрлық шешімдер ашықтық, бәсекелестік, кәсіби біліктілік және меритократия қағидаттарына негізделуі қажет.

Біздің ұстанымымыз айқын: біз алдын ала айыптау үшін емес, заңдылық пен әділдіктің сақталғанына көз жеткізу үшін әрекет етеміз.

Осыған байланысты «Байтақ» партиясы тиісті мемлекеттік органдар мен жауапты ұйымдарға ресми сауалдар жолдап, тағайындау рәсімдерінің талаптарға сәйкестігі, кандидаттардың кәсіби біліктілігі және шешім қабылдау үдерісінің ашықтығы жөнінде нақты түсініктемелер алуды көздейді.

Қоғамдық бақылаудың мақсаты — кінәлі іздеу емес, мәселенің мән-жайын анықтау, заң талаптарының орындалуына ықпал ету және мемлекеттік маңызы бар ғылыми ұйымдардың қызметіне деген қоғамдық сенімді нығайту.

Мониторинг нәтижелері бойынша партия өз ұстанымын жариялап, анықталған мәселелер болған жағдайда кадрлық саясаттың ашықтығы мен тиімділігін арттыруға бағытталған ұсыныстарын білдіреді.

Су ресурстарын қорғау — тек табиғатты қорғау емес. Бұл — елдің ертеңін қорғау. Ал елдің ертеңіне жауапты салаларда әрбір шешім заңды, негізді және қоғамға түсінікті болуы керек.

Азаматтық бақылау — жауапты қоғамның талабы.

Азаматхан Әміртаев, Қазақстанның «Байтақ» жасылдар партиясының төрағасы