2025 жылғы 9 шілдеде Алматыда өткен QAZAQ INVEST FORUM 2025 халықаралық инвестициялық алаңға айналды. Форум шеңберінде Қазақстан экономикасына бағытталған жалпы құны 5,25 трлн теңге (10 млрд АҚШ доллары) болатын Kazakh-Asia Investment Fund трансұлттық инвестициялық қоры құрылды.
Қордың қаражаты экология, жасыл энергетика, инфрақұрылым және орнықты өнеркәсіп бағыттарындағы жобаларды қаржыландыруға бағытталады. Сонымен қатар, форумда жалпы құны 225 млрд теңгеден асатын келісімдер жасалды. Олардың қатарында қағаз өндіру және қайта өңдеу зауыттары, күн панельдерін шығару, электромобильге арналған тежеу жүйесі сынды жобалар бар.
Іс-шараға Қазақстан мен Қытай арасындағы стратегиялық ынтымақтастық аясында екі елдің мемлекеттік органдары мен әлемдік компаниялар – Alibaba Group, Netflix International, Zichen Group, China Railway және басқа да инвесторлар қатысты.
Форум бағдарламасы пленарлық сессиялардан, B2B/B2G кездесулерінен және инвестициялық келісімдерге қол қою рәсімінен тұрды. Мемлекет тарапынан инвесторларға салықтық, кедендік жеңілдіктер мен институционалдық қолдау көрсетілетіні айтылды.
QAZAQ INVEST FORUM 2025 — Қазақстанды тұрақты, сенімді және технологиялық инвестициялық хаб ретінде танытудың маңызды кезеңі болды.